Rev 6 | KhmKCB | STEP | ពេល កូន ចៀម បក ត្រា មួយ ក្នុង ចំណោម ត្រាទាំង ប្រាំពីរ នោះខ្ញុំបាន ឃើញ ហើយ បាន ឮ សត្វ មានជីវិត មួយ ក្នុង ចំណោម សត្វ មាន ជីវិត ទាំង បួន និយាយ ដូចជា សំឡេង ផ្គរលាន់ ថា ៖ «ចូរ មក !»

Revelation of John 6

1 ពេលកូនចៀមបកត្រាមួយក្នុងចំណោមត្រាទាំងប្រាំពីរនោះខ្ញុំបានឃើញហើយបានឮសត្វមានជីវិតមួយក្នុងចំណោមសត្វមានជីវិតទាំងបួននិយាយដូចជាសំឡេងផ្គរលាន់ថា៖ «ចូរមក!» 2 ខ្ញុំក៏ឃើញសេះសមួយមកហើយអ្នកជិះនៅលើវាកាន់ធ្នូនិងបានទទួលមកុដមួយរួចបានចេញទៅទាំងមានជ័យជម្នះដើម្បីយកឈ្នះ។ 3 ពេលកូនចៀមបកត្រាទីពីរនោះខ្ញុំឮសត្វមានជីវិតទីពីរនិយាយថា៖ «ចូរមក!» 4 នោះមានសេះមួយទៀតមកមានសម្បុរក្រហមហើយអ្នកជិះនៅលើវាបានទទួលអំណាចដកយកសេចក្ដីសុខសាន្ដចេញពីផែនដីនិងធ្វើឲ្យមនុស្សសម្លាប់គ្នាទៅវិញទៅមកហើយគាត់បានទទួលដាវមួយយ៉ាងធំ។ 5 ពេលកូនចៀមបកត្រាទីបីនោះខ្ញុំឮសត្វមានជីវិតទីបីនិយាយថា៖ «ចូរមក!» ខ្ញុំក៏ឃើញសេះខ្មៅមួយមកហើយអ្នកជិះនៅលើវាកាន់ជញ្ជីងមួយនៅក្នុងដៃ 6 ហើយខ្ញុំបានឮដូចជាមានសំឡេងមួយនៅកណ្ដាលសត្វមានជីវិតទាំងបួននិយាយថា៖ «ស្រូវសាលីមួយនាលិថ្លៃមួយឌេណារីហើយស្រូវបាឡេបីនាលិក៏ថ្លៃមួយឌេណារីដែរប៉ុន្ដែកុំធ្វើឲ្យប្រេងនិងស្រាទំពាំងបាយជូខូចឡើយ!»។ 7 ពេលកូនចៀមបកត្រាទីបួននោះខ្ញុំបានឮសំឡេងសត្វមានជីវិតទីបួននិយាយថា៖ «ចូរមក!» 8 ខ្ញុំក៏ឃើញសេះមួយសម្បុរស្លេកស្លាំងហើយអ្នកជិះនៅលើវាឈ្មោះសេចក្ដីស្លាប់ហើយស្ថាននរកបានមកតាមក្រោយអ្នកនោះ។ សេចក្ដីស្លាប់និងស្ថាននរកបានទទួលសិទ្ធិអំណាចលើផែនដីមួយភាគបួនដើម្បីសម្លាប់ដោយដាវដោយគ្រោះអត់ឃ្លានដោយជំងឺអាសន្នរោគនិងដោយសត្វសាហាវនៅលើផែនដី។ 9 ពេលកូនចៀមបកត្រាទីប្រាំខ្ញុំក៏ឃើញនៅក្រោមកន្លែងថ្វាយតង្វាយមានព្រលឹងរបស់ពួកអ្នកដែលគេបានសម្លាប់ដោយព្រោះព្រះបន្ទូលរបស់ព្រះជាម្ចាស់និងដោយព្រោះសេចក្ដីបន្ទាល់ដែលពួកគេបានប្រកាន់យក 10 អ្នកទាំងនោះស្រែកដោយសំឡេងខ្លាំងៗថា៖ «ឱព្រះអម្ចាស់ជាព្រះដ៏បរិសុទ្ធនិងយុត្ដិធម៌អើយ! តើពេលណាទើបព្រះអង្គជំនុំជម្រះពួកអ្នកដែលរស់នៅលើផែនដីហើយសងសឹកឲ្យឈាមរបស់យើង?» 11 ពួកគេម្នាក់ៗបានទទួលអាវសវែងនិងត្រូវបានប្រាប់ឲ្យសម្រាកបន្ដិចទៀតទម្រាំពួកបាវបម្រើជាគូកននិងជាបងប្អូនរបស់ពួកគេដែលនឹងត្រូវគេសម្លាប់បែបដូច្នោះដែរបានគ្រប់ចំនួនសិន។ 12 ពេលកូនចៀមបកត្រាទីប្រាំមួយខ្ញុំក៏ឃើញថាមានការរញ្ជួយដីយ៉ាងខ្លាំងកើតឡើងថ្ងៃត្រលប់ជាងងឹតដូចជាក្រណាត់ធ្វើពីរោមពណ៌ខ្មៅហើយលោកខែទាំងមូលក៏ត្រលប់ដូចជាឈាម 13 រីឯផ្កាយលើមេឃក៏ធ្លាក់ចុះមកផែនដីដូចជាផ្លែល្វាខ្ចីៗជ្រុះពីដើមដោយត្រូវខ្យល់ធំបក់ប៉ះ 14 ហើយផ្ទៃមេឃបានបាត់ទៅដូចជាគេមូរអត្ថបទគម្ពីរទុកហើយគ្រប់ទាំងភ្នំនិងកោះក៏ត្រូវបានរើចេញពីកន្លែងរបស់វាដែរ។ 15 នោះពួកស្ដេចនៅផែនដីពួកអ្នកធំពួកមេទ័ពពួកអ្នកមានពួកអ្នកខ្លាំងពូកែនិងពួកបាវបម្រើព្រមទាំងពួកអ្នកមានសេរីភាពទាំងឡាយបានលាក់ខ្លួននៅក្នុងរអាងភ្នំនិងនៅតាមក្រហែងថ្មភ្នំ 16 ទាំងនិយាយទៅភ្នំនិងថ្មថា៖ «ចូរធ្លាក់មកលើយើងហើយបំបាំងយើងពីព្រះភក្រ្តរបស់ព្រះអង្គដែលគង់នៅលើបល្ល័ង្កនិងពីសេចក្ដីក្រោធរបស់កូនចៀមចុះ 17 ដ្បិតថ្ងៃដ៏អស្ចារ្យនៃសេចក្ដីក្រោធរបស់ព្រះអង្គនិងរបស់កូនចៀមបានមកដល់ហើយតើអ្នកណាអាចទ្រាំបាន?»